🌺 *बाप्पाच्या माहेरघरात कारागिरांची लगबग*🌺⬜गणेशमूर्तीवर शेवटचा हात रंगरंगोटी⬛ डोळे आखणीवर भर ⬜ दागिने सजावटीला प्राधान्य⬛

*गडब/अवंतिका म्हात्रे*

गणपतीचे आगमन होण्यास सहा दिवस उरले आहेत.आता बाप्पाच्या माहेरघरात म्हणजे पेणमध्ये गणेशमूर्तीकारांची खऱ्या अथनि अंतिम टप्यातील लगबग सुरू झाली आहे. ७ सप्टेंबर रोजी श्रींचे आगमन होणार असल्याने कारागीर गणेशमूर्तीवर शेवटचा हात फिरवण्यात व्यग्र झाले आहेत. यात गणेशमूर्तीची रंगरंगोटी, डोळे आखणी, फेटे आणि दागिन्यांच्या सजावटीचे काम दिवसरात्र सुरू आहे.

काही भाविक गणपतीच्या दिवशी मूर्ती न्यायला गणेश चतुर्थीला येतात तर काही भाविक दोन ते तीन दिवस आधी मूर्ती घेऊन जातात. त्यामुळे कारागिरांकडे आता श्वास घ्यायलाही वेळ नाही, इतकी त्यांची लगबग सुरू आहे. त्याचवेळी पेणमधील असंख्य दुकाने गणेशोत्सवासाठी फुलून निघाली आहेत. गणपतीच्या सजावटीचे साहित्य, मखर, भरपूर फुलून आली आहे.

बाबा अलंकार यांनी बाजारपेठ पेण तालुक्यातील अंतोरे, दादर, जोहे, कळवे, तांबडशेत, हमरापूर, वडखळ, दादर, बोरी, शिर्की, उंबर्डे, कोप्रोली यासह पेणमधील कासार आळी, गुरव आळी, फणसडोंगरी, नवीन वसाहत, कुंभार आळी, गांगळ आळी, नंदिमाल नाका, उत्कर्ष नगर येथील कारखान्यांमध्येही दिवस-रात्र काम सुरू आहे. या कारखान्यांमधील कारागीर मूर्तीवर रंगकामांचा अखेरचा हात फिरवण्यात दागिन्यांची सजावट करण्यात, आखणी करण्यात मग्न झाले आहेत. बहुतेक घरांमधील महिला, मुलीदेखील या कामात मोठे सहकार्य करत आहेत. दरम्यान, यंदा गणपतीच्या गावातून अमेरिका, इंग्लड, ऑस्ट्रेलिया, मॉरिशससह इतर देश आणि राज्यांमध्ये ७० ते ८० हजार गणेशमूर्ती रवाना करण्यात आल्या आहेत.

    ⭕पेणच्या गणेशमूर्ती जगभरात प्रसिद्ध आहेत. भारतासह परदेशातही गणपती उत्सव प्रचंड उत्साहात आणि आनंदात साजरा केला जातो. पेणची गणेशमूर्ती दिसायला सुंदर आणि सुबक असून डोळ्यांची आखणी आणि दागिन्यांची सजावट ही येथील कारागिरांची खासियत आहे. त्यामुळे पेणची गणेशमूर्ती भाविकांच्या डोळ्यात भरते. वडखळ गडब येथे असणाऱ्या कला केंद्रात सुद्धा अशीच लगबग सुरू असल्याचे दिसते⭕